ارچڪ مرچڪ (رسالو): ٻارن لاءِ پندرهن روزه هيءُ رسالو ”عبرت گروپ آف پبيليڪشن“ پاران فيبروري 1993ع کان حيدرآباد مان جاري ٿيو. ڊبل ڪرائون سائيز ۾ ڇپجندڙ هي رسالو ٻارن ۾ گهڻو مقبول رهيو. ’ارچڪ مرچڪ‘ نالي هن رسالي جا ايڊيٽر مسعود لوهار ۽ قادر ڪنڌر هئا. رسالي ۾ ٻارن لاءِ آکاڻيون، مضمون، شعر ۽ ٻيو گهڻو ڪجهه شايع ٿيندو هو. رسالي جي مستقل خاص ليکڪن ۾ پير نويد شاهه، وفا مولا بخش قنبراڻي، جاويد سوز هالائي، خالد آزاد، حزب الله سمون ۽ ٻيا شامل رهيا آهن. هي رسالو ٻه سال مستقل طور تي شايع ٿيڻ کانپوءِ بند ٿي ويو، بعد ۾ ٻيھر ڪجهه عرصي لاءِ شايع ٿيو، پر هلي نه سگهيو. اڳتي هلي ساڳئي نالي سان روزاني ’عبرت‘ ۾ ٻارن جو صفحو شايع ٿيڻ لڳو، جيڪو پڻ ٻارن ۾ گهڻو مقبول ٿيو. هن نالي سان عبرت گروپ آف پبليڪيشن حيدرآباد پاران ڪيترا سال لڳاتار ٻارن لاءِ ماهوار پرچو ڪڍيو ويو، جيڪو هاڻي بند ٿي ويو آهي.